Бишкек, 20.08.25 /Кабар/. Бириккен улуттар уюмунун Дүйнөлүк азык-түлүк программасы (ДАТП) Афганистандагы муктаж болгон үй-бүлөлөргө жакынкы үч айдын ичинде 2,5 миң тонна азык-түлүк берет. Бул тууралуу уюм өзүнүн сайтына жарыялаганын Интерфакс жазды.
Маалыматта белгиленгендей, ДАТП ошондой эле аталган жарандарга базардан азык-түлүк сатып алуу үчүн акча берип, ачарчылыктан катуу жабыркаган балдарды дарылоо үчүн атайын тамак-аш таратат.
Уюмдун маалыматы боюнча учурда Афганистанда 3,5 миллион бала ачарчылыктан жабыркайт. Бул былтыркыга салыштырмалуу 500 миңге көп.
“Бул жардам Евробиримдик берген 13 миллион евронун эсебинен ишке ашат”,-деп белгиленет маалыматта.
