Бишкек, 23.04.26. /Кабар/. Ысык-Көл облусунун Ак-Суу районуна караштуу Боз-Учук – Жыргалаң унаа жолунда реконструкциялоо иштери башталды. Бул тууралуу “Кыргызавтожол-Түндүк” мамлекеттик ишканасынан билдиришти.
Маалыматка ылайык, Боз-Учук – Жыргалаң унаа жолунун 14,5 чакырымдык тилкесинде убактылуу айланып өтүүчү жол уюштурулуп, суу өткөрүүчү темир-бетон түтүктөр орнотулууда.
Ошондой эле жолду кеңейтүү, жер казуу жана кошумча түтүктөрдү орнотууга даярдыктар көрүлүүдө.
Ал эми Боз-Учук – Жыргалаң унаа жолунун 8,5 чакырымдык тилкесинде жасалма курулмалар боюнча иштер жүрүп жатат.
Долбоордо жолду төрт тилкеге чейин кеңейтүү, тротуарларды салуу, жарык берүүчү чырактарды орнотуу жана мурда кыйылган бактардын ордуна жаңы көчөттөрдү отургузуу иштери камтылган.
Жол куруу иштери Капиталдык салымдар беренесинин эсебине киргизилип, №11 Жол тейлөө ишканасы тарабынан аткарылууда.
