Бишкек, 09.09.25 /Кабар/. Бишкек шаарынын мэри Айбек Жунушалиев Кореянын жылуулук берүү корпорациясынын (Korea District Heating Corporation) башкы директору Чон Ён Ки баштаган делегация менен жолугушту.
Муниципалитеттен билдиришкендей, жолугушууда энергетика тармагындагы эки тараптуу кызматташуунун мүмкүнчүлүктөрүн, анын ичинде борборлоштурулган жылуулук системасын өнүктүрүү талкууланды.
Ошондой эле жолугушууда отун-энергетика комплекси департаменти менен аталган корпорациянын ортосунда өз ара түшүнүшүү жөнүндө меморандумга кол коюлду.
Маалым болгондой, меморандум 6 багыт боюнча ишке ашырылат, анын ичинде жогорку технологияларды колдонуу менен жылытуу системасын модернизациялоонун стратегиялык планын иштеп чыгуу, көмүр кычкыл газын азайтуу, тарифтик план саясатын иштеп чыгуу бар.
