Бишкек, 04.12.25. /Кабар/. Бүгүн Каба уулу Кожомкул атындагы спорт ордосунда “Улуттук спорт мыктылары - 2025” аттуу иш-чара өттү. Бул тууралуу Дене тарбия жана спорт мамлекеттик агенттигинен билдиришти.
Аталган иш-чара 2025-жылдагы спорттун улуттук түрлөрү боюнча жетишилген ийгиликтерди белгилөө, мыкты спортчуларды жана федерацияларды аныктоо максатында уюштурулду.
Иш-чарага мамлекеттик катчы Арслан Койчиев, Дене тарбия жана спорт мамлекеттик агенттигинин директору Казыбек Молдажиев, спорт агенттигинин алдындагы мекемелердин жетекчилери, спорттук федерациялардын президенттери, улуттук спорт күйөрмандары жана спортчулар катышты.
Иш-чаранын алкагында бир нече номинациялар боюнча сыйлыктар тапшырылды. Алар мыкты спортчу, мыкты федерация, улуттук спортту өнүктүрүүгө салым кошкон инсандар жана командалар.
Белгилей кетсек, спорттун улуттук түрлөрү боюнча жыл мыктыларын аныктоо иш-чарасы Спорттун улуттук түрлөрү боюнча дирекциясы тарабынан уюштурулду.
