Бишкек, 17.07.26 /Кабар/. Бүгүн Бишкектеги “Ала-Арча” мамлекеттик жаратылыш паркында Шанхай Кызматташтык Уюмуна мүчө мамлекеттердин туризм боюнча III жаштар форуму өттү.
Мааданият, маалымат жана жаштар саясаты министрлигинен билдиришкендей, иш-чарага Туризмди өнүктүрүү мамлекеттик агенттигинин өкүлдөрү, жаштар уюмдарынын мүчөлөрү, туризм тармагынын адистери, эксперттер жана ШКУга мүчө өлкөлөрдүн расмий делегациялары катышты.
Форумда уюмга мүчө мамлекеттердин туристтик кызматташтыгын кеңейтүү жана туризм тармагындагы кызмат көрсөтүүлөрдүн сапатын жогорулатуу маселелери талкууланды. Катышуучулар экологиялык, тоо жана маданий туризмди өнүктүрүү, туристтик иш-чаралардын календарын жана туристтик агымдар тууралуу маалыматтарды камтыган ШКУнун бирдиктүү санариптик туристтик платформасын түзүүнү сунушташты. Ошондой эле туристтик алмашууларды кеңейтүү үчүн визалык жол-жоболорду жөнөкөйлөтүүнүн маанилүүлүгүнө өзгөчө көңүл бурулду.
Форумдун жыйынтыгында ШКУнун Катчылыгы туризм жана жаштар кызматташтыгын мындан ары өнүктүрүүгө багытталган биргелешкен долбоорлорду жана демилгелерди ишке ашырууга колдоо көрсөтүүгө даяр экенин билдирди.
