Бишкек, 03.10.26 /Кабар/. Бишкекте Билим берүү кызматкерлеринин күнүнө арналган салтанаттуу иш-чара өтүп, мыкты мугалимдерге батир, автоунаа жана акчалай сертификаттар тапшырылды. Бул тууралуу мэрия билдирди.
Иш-чара Т. Сатылганов атындагы Кыргыз улуттук филармониясында өтүп, ага Бишкек шаарынын мэри Айбек Жунушалиев, билим берүү жана илим тармагынын жетекчилери, шаардык кеңештин өкүлдөрү жана борбор калаанын педагогдору катышты.
Майрамдын алкагында “2026-жылдын мыкты мугалими” шаардык сынагынын жеңүүчүлөрү сыйланды. Биринчи, экинчи жана үчүнчү орундарды ээлеген 52 мугалимге 60, 80 жана 100 миң сомдук сертификаттар тапшырылды.
Сынакта өзгөчө жыйынтык көрсөткөн үч педагогго кошумча сыйлыктар берилди. №84 мектептин “Адам жана коом” сабагынын мугалими Нургүл Карыбековага Chevrolet Cobalt, №118 мектептин тарых мугалими Жылдыз Белековага Chevrolet Tracker үлгүсүндөгү автоунаалардын ачкычы тапшырылды.
Ал эми эң жогорку жыйынтыкты №31 мектептин музыка мугалими Нурбек Айдарбек уулу көрсөтүп, ага “Асман Резиденс” турак жай комплексинен бир бөлмөлүү батир берилди. Мындан тышкары, үй-бүлөсүнө керектүү тиричилик техникаларын сатып алуу үчүн 500 миң сомдук сертификат тапшырылды.
Мындан тышкары, шаардагы билим берүү тармагынын кызматкерлерине Ардак грамоталар, ыраазычылык каттары, төш белгилер жана баалуу белектер тапшырылды. Иш-чарага чакырылган педагогдорго эстелик белек катары аэрогрилдер берилди.
Белгилей кетсек, учурда Бишкектеги 122 муниципалдык мектепте, 129 мектепке чейинки билим берүү уюмунда жана кошумча билим берүү мекемелеринде 12 миңден ашык педагог эмгектенет.
Акыркы үч жылда борбор калаада 26 жаңы мектеп жана окуу корпусу курулуп, 144 билим берүү мекемеси капиталдык оңдоодон өткөн. Ошондой эле 21 жаңы бала бакча жана эки кошумча корпус пайдаланууга берилген.
