Бишкек, 27.08.26. /Кабар/. Бишкек шаарында бүтпөй турган курулуш объектилериндеги иштерди күчөтүү тапшырылды.
Мэриядан билдиришкендей, шаар жетекчиси Айбек Жунушалиев эки объектти кайрадан жеринен барып текшерди.
Алгач мэр Орозбеков көчөсү, 72 дарегинде жайгашкан, төрт деңгээлдүү унаа токтотуучу жайы бар “Ala Tower” көп функционалдуу борборунун курулушуна барды.
Ошондой эле Айбек Жунушалиев Байтик баатыр көчөсүндөгү 60, 62 жана 64-үйлөрдүн даректеринде көп батирлүү турак жай объектисинин абалы менен таанышты.
Бул объект боюнча инвестор аныкталып, жер тилкелерин сатып алуу иштери жүргүзүлгөн. Учурда курулуш иштерин баштоо үчүн зарыл болгон документтерди даярдоо иштери жүрүп жатканы айтылды.
Текшерүүнүн жыйынтыгында мэр эки объект боюнча тең иштерди күчөтүүнү жана аларды мындан ары белгиленген тартипте ишке ашырууну камсыз кылууну тапшырды.
