Бишкек, 29.05.26 /Кабар/. Токтогул Сатылганов атындагы Кыргыз улуттук филармониясында Куралдуу күчтөрдүн түзүлгөндүгүнүн 34 жылдыгына арналган салтанаттуу иш-чара өтүүдө.
Мааракеге мамлекеттик жана аскердик жетекчилер, ардагерлер, күч түзүмдөрүнүн өкүлдөрү, чек арачылар жана жоокерлер катышууда.
Иш-чаранын жүрүшүндө министрлер кабинетинин төрагасы Адылбек Касымалиев Куралдуу күчтөрдүн өздүк курамын жана ардагерлерин кесиптик майрамы менен куттуктады.
Ал өз сөзүндө мамлекеттин коргонуу жөндөмүн чыңдоо акыркы жылдары өлкө саясатындагы артыкчылыктуу багыттардын бири болуп жатканын белгиледи. Анын айтымында, Кыргызстан куралдуу күчтөрдү модернизациялоо, чек ара коопсуздугун бекемдөө жана аскер кызматкерлеринин социалдык шарттарын жакшыртуу боюнча олуттуу кадамдарды жасады.
“1992-жылдын 29-майында мурдагы советтик аскер бөлүктөрү Кыргызстандын карамагына өткөрүлүп берилип, улуттук армиянын түптөлүшүнө негиз салган. Ошондон бери Куралдуу күчтөр калыптануунун жана өнүгүүнүн татаал, бирок ийгиликтүү жолун басып өттү. Бүгүн мамлекет армияны заманбап курал-жарак жана аскердик техника менен мамлекеттин эсебинен камсыздоого мүмкүнчүлүк түздү. Аскердик инфраструктура жаңыланып, жаңы казармалар, аскер шаарчалары жана турак жайлар курулуп жатат. Аскер кызматкерлеринин эмгек акылары жогорулатылып, алардын социалдык абалын жакшыртууга өзгөчө көңүл бурулууда.
Элибиз эзелтеден мекен коргоочуларын урматтап келген. Кыргыз мамлекеттүүлүгүнүн тарыхы аскердик эрдик жана мекенчилдик менен тыгыз байланышкан. Бүгүнкү күндө да жоокерлер өлкөнүн көз карандысыздыгын, аймактык бүтүндүгүн жана улуттук коопсуздугун коргоодо бекем тирек болуп саналат. Мамлекет сиздерге ишенет жана таянат. Аскердик чеберчиликтин, кайраттуулуктун жана мекенге берилгендиктин үлгүсү бойдон кала бергиле”,- деди Адылбек Касымалиев.
Ал ошондой эле Кыргызстан аскердик кызматташтыкты эки тараптуу жана эл аралык уюмдардын алкагында активдүү өнүктүрүп жатканын белгилеп, тынчтык миссиялары бул багыттагы ишенимдүү кызматташтыктын айкын мисалы экенин кошумчалады.
Салтанаттуу азем Куралдуу күчтөрдүн аскердик оркестринин жана маданий кызматкерлеринин концерттик программасы менен уланууда. Мааракенин алкагында бир катар аскер кызматкерлери жана тармак өкүлдөрү сыйлыктар менен сыйланышты.
Белгилей кетсек, өлкөдө жыл сайын 29-май — Куралдуу күчтөрдүн күнү катары белгиленип келет. Бул күн эгемендүү Кыргызстандын улуттук армиясы расмий түрдө түзүлгөн күн болуп саналат.
