Бишкек, 09.05.25. /Кабар/. Күн мурун Улуу Ата Мекендик согуштагы Жеңиштин 80 жылдыгына карата Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиги менен биргеликте “Ак Нур Үмүт” коомдук фонду тарабынан “Аталардын эмгегине таазим” аттуу “Өлбөс полк” жөө жүрүшү иш-чарасы болуп өттү.
Иш- чарага агенттиктин кызматкерлери жана 7 дубандан келген ак элечек апалар катышты.
Жүрүш Бишкек шаарындагы Гоголь көчөсүнөн башталып, Улуу Жеңиштин символу болгон Өчпөс отко чейин уланып, согуш талаасында курман болгон кыргызстандык жоокерлердин элесине арналды. Ак элечек апалардын ар бири колунда өз ата-бабаларынын сүрөттөрүн көтөрүп, эр жүрөк муунга болгон таазимин билдиришти.
Иш-чарада агенттиктин директору Кудайберген Базарбаев 9-Май – Улуу Жеңиштин 80 жылдыгы менен чын жүрөктөн куттуктап, бул күн — адамзат тарыхындагы эң оор, бирок даңктуу күндөрдүн эстелиги. 85 жыл мурда дүйнө фашизмге каршы бир муштум болуп биригип, эркиндик жана келечек үчүн кандуу күрөшкө чыкканын билдирди.
“Бул Жеңиш – СССР элдеринин, анын ичинде биздин кыргыз элибиздин да кан, тер жана мээнет менен жаралган жалпыга таандык Жеңиши!
Улуу Ата Мекендик согушка 365 миң кыргызстандык катышканын, алардын 115 миңи кайтып келбей калган.Советтер Союзунун Баатырлары Суеркулов, Дүйшөнкул Шопоков, Чолпонбай Түлөбердиев сыяктуу тарыхта алтын тамгалар менен жазылган инсандардын эрдиктери урмат менен эскерилет”- деди Базарбаев
Иш-чаранын соңунда Өчпөс отко гүл коюлуп, согушта курман болгон баатырлардын ысымдарына арнап бир мүнөт үнсүз эскерүү өткөрүлдү.
Бул күн – унутулбаган тарых, муундан муунга өтө турган баатырдыктын символу катары элибиздин жүрөгүндө түбөлүк сактала берет.
