Бишкек, 12.12.25. /Кабар/. Бүгүн Улуттук илимдер академиясында "Айтматов окуулары – 2025" аттуу эл аралык илимий-практикалык конференция өттү. Бул тууралуу Маданият, маалымат жана жаштар саясаты министрлигинен билдиришти.
Конференция Илим, жогорку билим берүү жана инновациялар, Тышкы иштер жана Агартуу министрликтери, Улуттук илимдер академиясынын Ч. Айтматов атындагы адабият институту менен биргеликте уюштурулду.
Иш-чарага мамлекеттик катчы Арслан Койчиев, маданият министринин биринчи орун басары Союзбек Надырбеков, министрликтердин, Улуттук илимдер академиясынын өкүлдөрү, коомдук ишмерлер, илимпоздор, профессордук-окутуучулар жамааты жана студенттер катышты.
Ошондой эле жыйынга дипломатиялык корпустун жана эл аралык уюмдардын өкүлдөрү катышты. Алардын катарында Азербайжан, Казакстан, Россия, Тажикстан, Түркмөнстан, Түркия жана Өзбекстандын Кыргызстандагы элчиликтери, КР ЮНЕСКО иштери боюнча Улуттук комиссиясынын катчылыгынын өкүлдөрү болду.
Форумда "Айтматовдун мурасын изилдөөнүн азыркы абалы жана келечеги", "Айтматов медиа мейкиндикте", "Ч. Айтматовдун чыгармачылыгы мектепте жана жогорку окуу жайларда" сыяктуу актуалдуу илимий багыттар талкууланды.
Конференциянын алкагында китеп көргөзмөсү уюштурулуп, анда Айтматовдун азербайжан, армян, башкыр, грузин, казак, орус, тажик, татар, түркмөн, өзбек жана башка тилдерде жарыяланган сейрек басылмалары сунушталды. Экспонаттар Ч. Айтматов атындагы адабият институтунун 2024-2025-жылдардагы эл аралык илимий долбоорлорунун алкагында топтолгон жыйнактардан турду.
Иш-чарада жаңы басылмалардын бет ачарына өзгөчө басым жасалды. Алардын ичинде: Чынгыз Айтматовдун 12 томдук орус тилиндеги чыгармалар жыйнагы, президент Садыр Жапаровдун "Манас жана Айтматов" аттуу китеби, "Чингиз Айтматов – голос человечества. Библиография переводов на языки мира" маалымдамасы, Айтматовдун чыгармалары боюнча 5–11-класстарга арналган Хрестоматия, "Кадам" жана "Оку" басмалары чыгарган массалык окурманга багытталган китептер болду.
