Бишкек, 24.07.26. /Кабар/. VI Дүйнөлүк көчмөндөр оюндарынын алкагындагы “Биримдик кербени” 40 күндүк улуттук жүрүштүн суу алуу аземи Баткен облусунан башталды.
Өкүлчүлүктөн билдиришкендей, долбоордун алкагында алгач Лейлек районунун Төө жайлоосундагы касиеттүү Шооваз булагынан суу алуу аземи өткөрүлдү. Салттуу азем кыргыз элинин үрп-адаттарын жана көчмөн маданиятын чагылдырган көрүнүш менен коштолду.
Аземдин жүрүшүндө Лейлек районунан тандалган 10 атчанга Шооваз булагынын суусу салтанаттуу түрдө тапшырылды. Атчандар эртең, 25-июлда Раззаков шаарынан 40 күндүк улуттук жүрүштү баштап, өлкөнүн аймактарын кыдырып өтүшөт.
Иш-чарага президенттин Баткен облусундагы өкүлү Мамыржан Рахимов катышып, жалпы мекендештерди “Биримдик кербени” долбоорунун башталышы менен куттуктады.
“Эр азаматтарыбыз баштаган “Биримдик кербенинин” сапары байсалдуу болсун! Касиеттүү булактардын суусу элибизге береке, жергебизге тынчтык, өлкөбүзгө өнүгүү алып келсин!” – деди өкүл.
“Биримдик кербени” долбоорунун негизги максаты – кыргыз элинин биримдигин чыңдоо, тарыхын, көчмөн цивилизациясынын баалуулуктарын, улуттук каада-салтын жана маданий мурасын кеңири жайылтуу.
Долбоордун өзгөчөлүгү катары өлкөнүн 40 районундагы касиеттүү булактардан алынган суулар өз-өзүнчө көөкөрлөргө куюлат. Ар бир райондон 10дон атчан, жалпы 400 атчан катышып, сууну өлкө аймагын кыдырып алып жүрүшөт. Жүрүштүн соңунда бардык булактардын суусу борбор калаада бир идишке бириктирилип, VI Дүйнөлүк көчмөндөр оюндарынын ачылыш аземине жеткирилет.
Олимпиада оюндарынын символу от болсо, VI Дүйнөлүк көчмөндөр оюндарынын символу – суу болуп саналат. Бул жаратылышты, жашоону, тазалыкты, ынтымакты жана элдин биримдигин туюнтат.
Белгилей кетсек, II Дүйнөлүк көчмөндөр оюндарында “1000 комузчу”, III Дүйнөлүк көчмөндөр оюндарында “Этнобазар” негизги символдук иш-чаралардын бири болгон. Ал эми быйылкы VI Дүйнөлүк көчмөндөр оюндарынын башкы символдук долбоору катары “Биримдик кербени” тандалган.
Кербен өлкөнүн бардык аймактарын кыдырып, 40 районду бир руханий жолго бириктирет. 40 күндүк улуттук жүрүш 2026-жылдын 1-сентябрына чейин уланып, андан соң VI Дүйнөлүк көчмөндөр оюндарынын ачылыш аземи менен жыйынтыкталат.
