Бишкек, 03.08.26. /Кабар/. Базар-Коргон районунда уруксат берүүчү документтери жок курулуп жаткан кыш заводунун курулушу токтотулду. Бул тууралуу Курулуш, архитектура жана турак жай-коммуналдык чарба министрлигинен билдиришти.
Министрликке караштуу Мамлекеттик архитектура-курулуш контролдоо департаментинин маалыматына ылайык, Акман айыл аймагындагы объектте тиешелүү архитектуралык уруксаттар алынбастан жана мамлекеттик экспертизадан өткөрүлбөстөн курулуш иштери жүргүзүлгөн.
Адистер буга чейин бир нече жолу эскертүү бергенине карабастан, иштер улантылган. Натыйжада объектти куруп жаткан "Мадина компани" ЖЧКсына карата акт түзүлүп, курулушту токтотуу боюнча милдеттүү көрсөтмө берилди.
Компанияга 200 миң сом өлчөмүндө айып пул салынып, учурда заводдун курулуш иштери толугу менен токтотулду.
