Бишкек, 10.07.26. /Кабар/. Баткен облусунда экологиялык мыйзамдардын аткарылышын күчөтүү жана айлана-чөйрөнү коргоо маселелери талкууланды.
Президенттин Баткен облусундагы өкүлчүлүгүнөн билдиргендей, талкууга облус башчысынын биринчи орун басары Бактыбек Токсонбаев жана Ош экологиялык прокурору Чолпонбай Абдылдаев жана башка тиешелүү мамлекеттик мекемелердин өкүлдөрү катышты.
Жыйында Баткендеги экологиялык абал, жер казынасын мыйзамдуу пайдалануу, таштанды маселеси, суу ресурстарын сактоо жана өзгөчө корголуучу жаратылыш аймактарын коргоо көйгөйлөрү ортого салынды.
Белгиленгендей, өлкөдө экологиялык коопсуздукка көзөмөлдү күчөтүү максатында президенттин колдоосу менен Башкы прокуратуранын түзүмүндө Бишкек жана Ош экологиялык прокуратуралары түзүлүп, ишке кирген. Алар жер казынасын пайдалануу, суу объекттерин жана жаратылышты коргоо мыйзамдарынын аткарылышын түздөн-түз көзөмөлдөйт.
Жыйындын соңунда мекемелер аралык кызматташууну күчөтүү пландары белгиленди.
Экологиялык мыйзам бузууларга күбө болгон жарандар төмөнкү номерлерге кайрыла алышат:
- Бишкек экологиялык прокуратурасы: +996 (312) 32-35-08, +996 (555) 758-677;
- Ош экологиялык прокуратурасы: +996 (500) 993-330, +996 (552) 547-647.
