Бишкек, 24.07.26. /Кабар/. Турак жай-жарандык курулуш департаментинин директорунун орун басары Мирлан Бузурманкулов Баткен районунда курулуп жаткан бир катар социалдык объекттердин курулуш иштеринин жүрүшү менен таанышты.
Курулуш министрлигинен билдиришкендей, иш сапардын жүрүшүндө курулуш иштеринин сапаты, жумуштардын жүрүшү жана бекитилген графиктин аткарылышы текшерилди.
Тактап айтканда, төмөнкү объекттер жеринен текшерилди:
- Кадамжай районунун Айырбас айылындагы 500 орундуу жаңы мектеп;
- Баткен районунун Жаңы-Жер айылындагы 500 орундуу жаңы мектеп;
- Баткен районунун Жаңы-Достук айылындагы 225 орундуу мектеп, 100 орундуу бала бакча жана ФАП.
Белгилей кетсек, Айырбас айылындагы 500 орундуу мектептин курулушу 2024-жылдын октябрь айында башталган. Учурда курулуш иштери дээрлик аяктап, эмеректерди орнотуу жана аймакты көрктөндүрүү жумуштары жүргүзүлүүдө. Объекттин жалпы наркы 157 миллион сомду түзөт.
Ал эми Жаңы-Жер айылындагы 500 орундуу мектептин курулушу 2023-жылдын сентябрь айында башталган. Бүгүнкү күндө курулуш-монтаждоо иштеринин акыркы этаптары аткарылууда. Долбоор республикалык бюджеттин эсебинен каржыланып, жалпы наркы 164 миллион сомду түзөт.
Ошондой эле Жаңы-Достук айылында 225 орундуу мектептин, 100 орундуу бала бакчанын жана ФАП курулушу уланууда.
