Бишкек, 15.05.26. /Кабар/. Бүгүн Баткен районунун алыскы Зардалы айылында футбол аянтчасы ачылды. Бул тууралуу президенттин облустагы өкүлчүлүгүнөн билдиришти.
Бул футбол талаасы президенттин фондунун эсебинен Баткен облусунда курулуп жаткан 10 кичи футбол аянтчасын бири.
Иш-чарага катышкан район акими Данир Иманалиев бул аракет жаштардын жана жалпы эле айыл элинин сергек жашоо образын калыптандыруу менен спортко болгон кызыгуусун арттырууга шарт түзөрүн белгиледи.
Жогоруда айтылган футбол аянтчалары жергиликтүү бийликке катталып, жалпы элге кызмат кылат.
Оюн аянтчалары төмөнкү аймактарда курулууда.
- Баткен шаарынын Тамаша-Жай, Ак-Таш, Чет-Булак жана Булак-Башы аймактык башкармалыктарында;
- Баткен районунун Бужум айылында;
- Алтын-Бешик айыл аймагынын Газ, Кыштут айылдарында;
- Самаркандек айыл аймагынын Жаңы-Бак айылында.
Белгилей кетсек, мындан ары да өлкө башчысынын колдоосу менен облустун ар бир айылына футбол аянтчасын куруу пландалган.
