Бишкек, 20.07.26. /Кабар/. Баткен шаарында 10 миң орунга ылайыкталган стадиондун курулушу кызуу жүрүүдө. Бул тууралуу президенттин аймактагы өкүлчүлүгүнөн билдиришти.
Маалыматка ылайык, бүгүн облус башчысы Мамыржан Рахимов курулуш иштеринен кабар алды.
Учурда курулуштун негизги бөлүгү аяктап, 60 пайыз жумуш аткарылды. Курулушту ушул жылдын октябрь айынын аягына бүткөрүү пландалууда.
"Жалпы аянты 10 га аянтты түзгөн стадиондо футбол аренасынан сырткары 3 машыгуу оюн талааларын жана төрт кичи футбол аянтчалары, 100 кишилик жатакана комплекси, 200 унаага ылайыкталган унаа токтотуучу жай болот", - деп айтылат маалыматта.
Стадиондун курулушунун аякташы менен облустук жана республикалык маанидеги масштабдуу иш чараларды өткөрүүгө заманбап шарт түзүлөт.
Белгиленгендей, бул иштер президенттин "2024-2034-жылдарга Кыргызстанда футболду андан ары өнүктүрүү боюнча чаралар жөнүндө" жарлыгынын алкагында ишке ашууда.
