Бишкек, 04.02.26. /Кабар/. Баткен районунун Жаңы-Жер айылында заманбап сугат системасы курулуп, 200 гектар аянтка интенсивдүү бак отургузулат. Бул тууралуу президенттин облустагы өкүлчүлүгүнөн билдиришти.
Президенттин өкүлү Айбек Шаменов ишке ашырыла баштаган заманбап сугат инфраструктурасын өнүктүрүү жана интенсивдүү багбанчылыкты жайылтуу долбоорунун курулушунан кабар алды.
Долбоордун жалпы өздөштүрүлүүчү аянты 200 гектарды түзөт. Бул жерде сууну үнөмдөөчү технологияларды колдонуу менен заманбап жемиш бактары отургузулат. Азыркы учурда көлөмү 25 000 куб метрди түзгөн суу топтоочу резервуар курулууда. Бул сугат мезгилинин бардык учурунда туруктуу жана кепилденген суу берүүнү камсыздайт.
Долбоор үчун республикалык бюджеттен 54 млн сом каржыланат. Мындан сырткары, жергиликтүү бюджеттен каржылоо каралган.
Аймакта жогорку түшүм берүүчү өрүктүн заманбап жарым карлик сортторунун көчөттөрүн отургузуу пландалууда. Бул түшүмдү эрте алууга, өндүрүмдүүлүктү жогорулатууга жана суунун чыгымын кыйла азайтууга мүмкүндүк берет.
