Бишкек, 13.01.26. /Кабар/. Баткенде сугат системасын өнүктүрүүгө багытталган жарманке өттү. Бул тууралуу президенттин аймактагы өкүлчүлүгүнөн билдиришти.
Айыл чарба жарманкеси "Фергана өрөөнүндө ирригация тармагындагы өнөктөштүк" жана "Агро Караван 2026" долбоорлорунун алкагында уюштурулуп, жергиликтүү өндүрүүчүлөр, ишкерлер жана чарба ээлерине айыл чарба продукциялары жана башка товарлар сунушталды.
Негизги максаты — фермерлерди, бизнес өкүлдөрүн, каржылык институттарды жана ирригация тармагында иштеген компанияларды бир аянтчага чогултуп, жаңы технологиялар, жабдуулар, кызматтар жана инвестициялык мүмкүнчүлүктөр менен тааныштыруу болуп саналат.
Жарманкеге Баткен облусунун бардык аймактарынан 150дөн ашык фермерлер катышты. Ошондой эле 20дан ашык көргөзмө стенддер жайгаштырылып, жергиликтүү өндүрүүчүлөрдүн продукциялары коюлду.
Жарманкенин соңку бөлүгүндө катышуучулар үчүн пленардык талкуу жүргүзүлүп, анда банктардын, каржы мекемелеринин жана фонддордун өкүлдөрүнүн, ошондой эле тамчылатып сугаруу системаларын жеткирүүчү компанияларынын өкүлдөрүнүн маалымат берүүсү менен жыйынтыкталды.
