Бишкек, 03.02.26. /Кабар/. Кызыл-Кыя жана Кадамжай районунун аймагынан агып өткөн "Тешик" сугат каналынын коргоо аймагы мыйзамсыз курулуштардан тазаланууда. Бул тууралуу президенттин Баткен облусундагы өкүлчүлүгүнөн билдиришти.
Аталган каналдын сыйымдуулугу 1 куб, жалпы узундугу 23 чакырымды түзөт. Анын 4,7 чакырымы Кызыл-Кыя шаарын аралап өткөн. Каналдын коргоо аймагына жарандар өз билемдик менен ар кандай курулуштарды куруп алган.
Натыйжада каналды тейлөө жолдору жабылып калып, оңдоп-түзөө, тазалоого мүмкүнчүлүк болгон эмес.
Мындан улам мэрия менен райондук суу чарба башкармалыгы элге түшүндүрүү иштерин жүргүзүп, каналдын айланасындагы курулуштарды тазалап, каналды оңдоп-түзөө иштери жүргүзүлүүдө.
Ушундай эле абал Кадамжай районундагы Анхор каналынын айланасында да болгон. Бирок, учурда каналдын коргоо аянттарына курулуш куруп алган жарандар өз ыктыяры менен курулуштарын бузуп, тазалап берүүдө.
Натыйжада жалпы узундугу 18,6 чакырым каналдын 300 метр аралыгы оңдоп-түзөөдөн өттү. Сугат каналы 3,5 гектар жерди сугат суу менен камсыз кылат. Оңдоп-түзөө иштерине Азия өнүктүрүү банкынан 3 млн сомго жакын акча каражаты каралган.
