Бишкек, 20.07.26. /Кабар/. Президенттин Баткен облусундагы өкүлү Мамыржан Рахимов Миң-Өрүк – Самаркандек унаа жолунун курулушунан кабар алды.
Өкүлчүлүктөн билдиришкендей, узундугу 3,2 чакырым болгон жол Тажикстан менен чектеш аймакта курулууда. Курулуш республикалык бюджеттен каржыланып, 2028-жылы пайжаланууга берүү пландалган.
"Жаңы курулуп жаткан жол азыркы учурда пайдаланып жаткан жолго караганда Лейлек тарапка 3 чакырымга, ал эми Самаркандек айылына 17 чакырымга кыскарат. Бүгүнкү күндө зоону жардырып жол куруу, көпүрөнүн таянычтарын куруу иштери кызуу жүрүп жатат", - деп айтылат маалыматта.
Маалыматта белгиленгендей, жолдун туурасы 10 м болуп асфальтталат. Дарыянын жана жолдун үстүнөн узундугу 266 м болгон эстакадалык көпүрөнүн курулушу долбоорлонгон. Жол түнкүсүн жарыктандырылат. Курулуш үчүн бир бетон даярдоочу завод жана бир таш майдалоочу жабдык курулуп, иштеп жатат.
