Бишкек, 05.08.25. /Кабар/. Баткенде мамлекеттик кызматкерлер кан тапшыра башташты. Бул тууралуу президенттин аймактагы өкүлчүлүгүнөн билдиришти.
Бүгүн президенттин өкүлүнүн биринчи орун басары Бактияр Токсонбаев баштаган кызматкерлер Баткен облустук кан борборунда кан тапшырып, өлкөдө старт алган ыктыярдуу донорлук иш-чарасын баштап беришти.
Бул акциянын негизги максаты — коомчулукта ыктыярдуу донорлукту жайылтуу, ооруканада дарыланып жаткан жарандарга жардам берүү жана мекенге кызмат кылуунун дагы бир үлгүсүн көрсөтүү болуп саналат.
Белгилей кетсек, күн мурун министрлер кабинетинин төрагасы Адылбек Касымалиев мамлекеттик кызматкерлерди кан тапшырууга жана ыктыярдуу донор болууга чакырып, бул багытта активдүү жарандык позицияны көрсөтүүгө үндөгөн.
Анын айтымында, кан тапшыруу – адамдын өмүрүн сактап калууга жардам берген асыл иш. "Ар бир тамчы кан – бул кимдир бирөө үчүн жашоо. Мамлекеттик кызматкерлер коом алдында үлгү болушу керек", – деди Адылбек Касымалиев.
Ал ошондой эле мамлекеттик мекемелерде кан тапшыруу өнөктүктөрүн уюштурууну жана кызматкерлерге бардык шарттарды түзүүнү тапшырды.
