Бишкек, 17.03.26. /Кабар/. Баткен облусунда кайра жаралуучу энергия булактарын өнүктүрүү максатында ири инвестициялык долбоорлорду ишке ашыруу пландалууда. Бул тууралуу президенттин Баткен облусундагы өкүлү Мамыржан Рахимов менен Кытайдын эң ири мамлекеттик энергетикалык корпорацияларынын бири – China Huaneng Group Co., Ltd. компаниясынын өкүлдөрүнүн жолугушуусунда белгилүү болду.
Өкүлчүлүктөн билдиришкендей, инвесторлор долбоорду Кадамжай районунун Молдо-Нияз айыл аймагында ишке ашырууга кызыкдар жана күн, шамал жана суудан электр энергиясын өндүрүү мүмкүнчүлүктөрүн карашууда.
Белгиленгендей, курулуш учурунда 500-700, ал эми ишке киргенден кийин 60-80 туруктуу жумуш орду түзүлөт.
Облус башчысы Мамыржан Рахимов билдиргендей, облус аймагында "жашыл" энергетика үчүн 4 552 гектар жер трансформацияланып, тиешелүү фондго өткөрүлүп берилген. Ал Баткен облусун күн нуруна бай аймак экени жана бул долбоор өлкөнүн түштүк аймагынын энергетикалык коопсуздугун чыңдоого, бюджетке салыктык түшүүлөрдү көбөйтүүгө чоң салым кошорун белгиледи.
China Huaneng Group Co., Ltd. – Кытайдын эң ири мамлекеттик энергетикалык корпорацияларынын бири жана өлкөнүн "беш чоң" мамлекеттик энергетика компанияларынын катарына кирет.
