Бишкек, 05.03.26. /Кабар/. Баткен облусунда деградация болуп бара жаткан жерлерди кайрадан токойго айлантуу үчүн дүйнөлүк тажрыйбада колдонулган жаңы ыкма ишке ашырыла баштады. Бул тууралуу президенттин Баткен облусундагы өкүлчүлүгүнөн билдиришти.
Адистер бадамдын үрөнүн топурак жана биогумус менен аралаштырып, кичинекей тоголокторду жасашат. Бул ыкма эл аралык тилде "seed balls" деп аталат. Баткендин климаты кургак болгондуктан, жөн эле себилген үрөн өнбөй калышы же аны канаттуулар жеп кетиши мүмкүн.
Ал эми топурактан жасалган "коргоочу кабыгы" бар тоголоктор төмөнкү функцияларды аткарат:
- үрөндү күндөн жана канаттуулардан коргойт;
- жамгыр жааганда керектүү нымдуулукту жана азыкты ичинде сактайт;
- татаал, техника бара албаган тоолуу жерлерде бат өнүп чыгууга шарт түзөт.
Учурда бул иш-чара Баткен районунун Сортташ тилкесинде жана Кадамжай районунун Үч-Коргон токой чарбасында жүрүп жатат. Жалпысынан 8 гектар жерге бадам эгилүүдө.
Бул демилге президент Садыр Жапаровдун тоолуу аймактарды өнүктүрүү боюнча беш жылдык программасынын алкагында ишке ашырылып, эл аралык БУУнун азык-түлүк жана айыл чарба уюму тарабынан колдоого алынууда.
Негизги максат — Баткендин табиятын сактап калуу жана келечекте чоң бадам токойлорун пайда кылуу.
