Бишкек, 22.05.26. /Кабар/. Баткен шаарынын Чет-Булак кварталында 1200 орундуу заманбап мектептин курулушу башталды.
Президенттин облустагы өкүлчүлүгүнөн билдиришкендей, иш-чарага Баткен облусунун башчысы Мамыржан Рахимов жана Евразиялык турукташтыруу жана өнүктүрүү фондунун донорлук долбоорлорду ишке ашыруу департаментинин директорунун милдетин аткаруучу Алексей Плохута баштаган өкүлдөр катышты.
Облус башчысы мындай ири долбоорлор эки өлкөнүн ынтымагын жана кызматташтыгын бекемдөөгө, ошондой эле келечек муундун татыктуу билим алуусуна шарт түзүүгө багытталганын белгиледи.
Буга чейин курулуш аянтчасында жер казуу иштери жүрүп, Баткен облустук капиталдык курулуш башкармалыгы тарабынан мектептин инженердик-коммуникациялык тармактарын тартуу жумуштары бүткөрүлгөн. Ал эми бүгүн билим берүү мекемесиний пайдубалына бетон куюу иштери расмий түрдө башталды.
Белгилей кетсек, аталган мектептин курулушуна мезгил кутучасын салуу аземине Кыргызстан менен Россиянын президенттери Садыр Жапаров жана Владимир Путин онлайн форматта катышкан.
Билим берүү мекемеси акыркы үлгүдөгү окуу кабинеттери, заманбап лабораториялар, спорттук зал, ашкана жана бассейн менен камсыздалат. Мектепте ата мекендик педагогдор менен бирге атайын Россиядан келген мугалимдер да билим беришет.
