Бишкек, 19.05.26. /Кабар/. Президенттин Баткен облусундагы өкүлү Мамыржан Рахимов 102 жаштагы Шарапат Бөдөновадан кабар алып, Энелер күнү менен куттуктады.
Өкүлчүлүктөн билдиришкендей, Бөдөнова Кадамжай районунун Кыргыз-Кыштак айылынын тургуну.
Облус башчысы энеге бекем ден соолук, узак жана бакубат жашоо каалап, белектерин тапшырды.
Шарапат апа өзүнүн өмүр жолу, басып өткөн турмуштук тажрыйбасы тууралуу айтып берип, мамлекетте жүрүп жаткан өнүгүү иштерине ыраазычылыгын билдирип, батасын берди.
Белгилей кетсек, Энелер күнүнө карата Баткен облусундагы 100 жаштан ашкан 19 энеге облус башчысынын куттуктоосу жана белектери жеткирилүүдө. Бул иш-чара улуу муун өкүлдөрүнө урмат көрсөтүү, алардын эмгегин баалоо жана жаш муунга өрнөк болгон энелердин кадыр-баркын даңазалоо максатында уюштурулууда.
