Бишкек, 22.07.26. /Кабар/. Баткен облусунда 2026-жылы Өнүктүрүү фонду аркылуу каржыланып жаткан 10 долбоордун аткарылышы жеринде көзөмөлдөндү.
Президенттин облустагы өкүлчүлүгүнүн маалыматына ылайык, долбоорлор социалдык көйгөйлөрдү чечүүгө, инфраструктураны жакшыртууга жана мекемелердин материалдык-техникалык базасын чыңдоого багытталган.
Бүгүн президенттин Баткен облусундагы өкүлүнүн биринчи орун басары Бактыбек Токсонбаевдин төрагалыгы алдында өткөн отурумдун жүрүшүндө долбоорлорду ишке ашырууда үнөмдөлгөн каражаттарды, курулуш жана жабдуу иштерин толук бүтүрүүгө багыттоо маселеси каралып, тиешелүү чечимдер кабыл алынды.
Андан соң комиссия фонддун колдоосу менен ишке ашырылып жаткан бир катар долбоорлордон жеринде кабар алды.
Алгач Өзгөчө кырдаалдар министрлигинин Баткен облустук башкармалыгына фонддун эсебинен сатып алынган атайын техникалар жана жабдуулар көрсөтүлдү. Адистер комиссия мүчөлөрүнө алардын өзгөчө кырдаалдардын кесепеттерин жоюудагы мааниси, мүмкүнчүлүктөрү жана колдонуу тартиби тууралуу кеңири маалымат беришти. Ошондой эле Баткен облустук телерадиокомпаниясында эфирдик студияны жаңылоо долбоорунун жүрүшү текшерилди. Долбоор алкагында студия заманбап жабдуулар, жарык берүү системалары жана жаңы эмеректер менен камсыздалууда.
Жыйынтыгында жооптуу жетекчилерге долбоорлорду сапаттуу жана өз мөөнөтүндө бүтүрүү, бөлүнгөн каражаттарды максаттуу пайдалануу боюнча тапшырмалар берилди.
