Бишкек, 18.06.25. /Кабар/. Балыкчы шаарындагы жер тилкеси мамлекетке кайтарылды. Бул тууралуу Улуттук коопсуздук мамлекеттик комитетинен билдиришти.
Атайын кызматтын маалыматына караганда, Балыкчы шаарынын аймагында мыйзамсыз менчиктештирилген жер тилкелерин жана мүлктүк комплекстерди кайтаруу боюнча мамлекеттик саясатты ишке ашыруунун алкагында 5192 чарчы метр курулушу бар УСМ-4 ("Геоминвод") мүлктүк комплекси мамлекеттин менчигине кайтарылды.
Алсак, УКМК органдары тарабынан көрсөтүлгөн өнөр жай объекттери жана жер участоктору Кыргызстандын колдонуудагы мыйзамдарынын ченемдерин бузуу менен мамлекеттин балансынан чыгарылгандыгы аныкталган.
Объекттерди жана мурдагы мамлекеттик ишкананын жер тилкелерин мамлекетке кайтарып берүүгө менчик ээлери өз ыктыяры менен макул болушкан.
