Бишкек, 21.05.25. /Кабар/. Бүгүн кыргызстандык болочок ажылардын алгачкы тобу ыйык Медина шаарына жетип, зыярат жайларына жакын жайгашкан мейманканаларга жайгаша баштады.
Кыргызстан мусулмандар дин башкармалыгынан билдиришкендей, зыяратчыларды ажылыкты уюштуруу штабынын Медина шаары боюнча жооптуу өкүлдөрү — Жоробай ажы Шергазиев жана Алмаз ажы Умарбеков тосуп алышты.
Медина шаары боюнча жооптуу өкүл Жоробай ажы Шергазиев Медина шаарында аткарылуучу ибадаттар жана зыяраттар боюнча маалымат берди.
"Ажылык — мусулман үчүн парз болгон улуу ибадат. Кыргызстандык зыяратчылардын ыйык Мединага аман-эсен келип, Мадинадагы мейманканаларга жайгашуусу — Алла Тааланын чоң ырайымы. Ар бир зыяратчы жүрөгүндө ихлас, тилегинде сабыр менен шүгүрдү көтөрүп, бул сапарды такыбаа жана ихсан менен өтөөгө умтулусу зарыл. Анткени, бир учурда миллиондогон адамдар келгендиктен ажылык машакат", — деди Жоробай ажы.
