Бишкек, 11.03.26. /Кабар/. Ата мекендик адистер Австралияда өтүп жаткан 2026-жылкы аялдар арасындагы Азия кубогунда кызмат кылууда. Бул тууралуу Кыргыз футбол биримдигинен билдиришти.
Маалыматка ылайык, калыс Вероника Бернацкая 2-март күнү мелдештин А тайпасындагы Корея — Иран беттешин тейлесе, 7-март күнү Индия — Япония курама командаларынын оюнунда да калыстык милдетин аткарды.
Мындан тышкары, КФБнын адиси Жибек Кубанычбек кызы Сидней шаарындагы беттештердин медиа-офицери катары иш алып барууда. Ал эми Алия Бейшеева Азия футбол конфедерациясынын расмий фотокорреспонденти катары кызмат өтөп жатат.
Белгилей кетсек, 2026-жылдагы аялдар арасындагы Азия кубогу — Азия континентиндеги аялдар футболу боюнча эң ири мелдеш болуп саналат. Турнирге 12 улуттук курама команда катышууда.
