Бишкек, 23.03.26 /Кабар/. Кыргызгидромет кызматы 24-марттан 30-мартка чейин өлкө аймагында күтүлгөн аба ырайы тууралуу маалымат таратты. Ага ылайык, аптанын башында көпчүлүк аймактарда жаан-чачын жааса, кийинки күндөрү абанын температурасы +25 градуска чейин көтөрүлүшү болжолдонууда.
Чүй жана Талас облустары
Чүй облусунда 24-мартта түнкүсүн жана күндүз жаан, тоолуу райондордо кар жаайт. Айрым жерлерде жаан-чачын катуу болушу мүмкүн. 25-марттан тарта күн ачылып, температура кескин жогорулайт. Апта соңунда (28-30-март) термометрдин көрсөткүчү +20…+25 градуска чейин жетет.
Талас облусунда 24-мартта түнкүсүн гана бир аз жаан-чачын күтүлөт, калган күндөрү күн ачык болот. Абанын температурасы 24-мартта +12…+17 болсо, 30-мартка карата +18…+23 градуска чейин жылыйт.
Ош, Жалал-Абад жана Баткен облустары
Түштүк аймактарда аптанын басымдуу бөлүгүндө күн ачык болуп, жылуу аба ырайы сакталат:
- Ош жана Жалал-Абадда: 24-мартта түнкүсүн жаан-чачын катуу жаашы ыктымал. 25-29-март аралыгында күн ачык болуп, температура +21…+26 градуска чейин көтөрүлөт. 30-мартта Ош облусунун айрым жерлеринде кайрадан жаан жаашы күтүлөт.
- Баткенде: 24-мартта түнкүсүн жаан жааса, күндүз күн ачылат. Апта ортосунда абанын температурасы +21…+26 градуска чейин жетет. 29-30-мартта айрым жерлерде жаан жаашы мүмкүн.
Ысык-Көл жана Нарын облустары
Өлкөнүн бийик тоолуу аймактарында аба ырайы туруксуз болот:
- Ысык-Көлдө: 24-мартта айрым жерлерде жаан-чачын катуу жаайт. 25-марттан тарта күн ачылып, апта аягына чейин температура +13…+18 градуска чейин жогорулайт.
- Нарында: 24-25-мартта кар жаашы күтүлөт. 26-марттан баштап жаан-чачын токтоп, күн жылый баштайт. Апта соңунда күндүз +9…+14 градус жылуу болот.
