Бишкек,27.02.25. /Кабар/. Америкалык Intuitive Machines компаниясынын "Афина" аталышындагы Nova-C аппараты Айга учту. Бул тууралуу ТАСС АКШнын аэронавтика жана космос мейкиндигин изилдөө боюнча улуттук башкармалыгынын (NASA) маалыматына таянып билдирди.
Аппарат 26-февралда Флоридадагы космостук борбордон учурулду. Эми ал Айга 6-мартта конору пландалууда.
Модуль NASA`нын илимий изилдөөлөрүн жүргүзүп, Айга адамдын учуусуна даярдык көрүү үчүн технологияларды сыноодон өткөрөт.
Аппарат Айга суу менен көмүр кычкыл газын изилдөөчү кошумча жабдыктарды да алып барат.
Бургулоочу TRIDENT кыртыштан ылдый 1 метр тереңдикке чейин кирүүгө жөндөмдүү. Ал Жерден аралыктан эле башкарылат. Ал эми масс-спектрометр MSOLO органикалык жана органикалык эмес бирикмелерди анализдейт.
