Бишкек, 29.05.26. /Кабар/. Баткенде беш миңден ашуун бүтүрүүчү мектепти аяктады. Бул тууралуу президенттин Баткен облусундагы өкүлчүлүгүнөн билдиришти.
Бүгүн облус башчысы Мамыржан Рахимов Баткен шаарындагы №4 орто мектепте өткөн акыркы коңгуроо салтанатына катышты.
Облус башчысы жалпы окуучуларды, мугалимдерди жана ата-энелерди 2025–2026-окуу жылынын ийгиликтүү аякташы менен куттуктап, бүтүрүүчүлөргө ак жол, кең келечек жана мекенге кызмат кылган билимдүү, мекенчил жаштардан болуусун каалады. Өз сөзүндө билим берүү тармагындагы мугалимдердин эмгегин өзгөчө белгилеп, жаш муундарды тарбиялоодогу жоопкерчиликтүү иштери үчүн ыраазычылык билдирди.
Ошондой эле билим берүү тармагында үзүрлүү эмгеги менен айырмаланган бир катар мугалимдерге Ардак грамоталары жана Алкыш баракчалары тапшырылды.
Белгилей кетсек, быйыл Баткен облусу боюнча 11-классты 5 миң 661 бүтүрүүчү аяктаса, 9-классты 10 миң 782 окуучу бүтүрүүдө. Ал эми 1-классты 9 миң 780 окуучу ийгиликтүү аяктап жатат.
Бүгүнкү күндө облус аймагындагы 236 мамлекеттик мектепте акыркы коңгуроо салтанаты өттү. Жалпы 131 543 окуучу 2025–2026-окуу жылын ийгиликтүү жыйынтыктоодо. Мындан тышкары, Баткен облусунда 22 жеке менчик мектеп билим берүү багытында ишмердүүлүгүн жүргүзүп келет.
