Бишкек, 05.08.26. /Кабар/. “Абанын сапатын жакшыртуу” долбоорунун ишке ашырылышын караган жыйын болуп өттү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, жыйынга министрдин биринчи орун басары, жетектөөчү комитеттин төрагасы Жеңиш Сейдалиев төрагалык кылды.
Анда жыл башынан бери аткарылган иштердин жыйынтыгы каралып, долбоордун ишке ашырылышына кеңири талдоо жүргүзүлдү.
Жетектөөчү комитеттин төрагасы иштин натыйжалуулугун баалоодо негизги көрсөткүч отчеттор эмес, эл сезе турган реалдуу жыйынтык болушу керектигин белгиледи.
Ошондой эле долбоорду ишке ашыруудагы айрым кемчиликтерге көңүл бурулуп, иштин темпин күчөтүү, мамлекеттик органдардын өз ара координациясын жакшыртуу жана белгиленген иш-чараларды өз мөөнөтүндө сапаттуу аткаруу боюнча тиешелүү тапшырмалар берилди.
Жыйындын соңунда кабыл алынган чечимдердин аткарылышын күчөтүү жана бардык жооптуу мамлекеттик органдар менен өнөктөштөрдүн биргелешкен ишин активдештирүү зарылдыгы белгиленди.
