Бишкек, 07.04.25./Кабар/. 8 айдан бери дайынсыз болуп жаткан Кызыл-Кыя шаарынын тургуну Ысык-Көлдөн табылды. Бул тууралуу Баткен облустук ички иштер башкармалыгынан билдиришти.
Маалыматка ылайык, 2024-жылдын 16-сентябрда Кызыл-Кыя ШИИБге Араван районунун Төө-Моюн айылынын тургуну кайрылып, баласы 35 жаштагы Төрөкулов Акбар Мажитович Кызыл-Кыя шаарынын Асаналиева көчөсүндө жайгашкан автобекеттен Бишкек шаарына такси менен кетип, 11-сентябрь күнү апасына байланышка чыгып, ошол күндөн тартып дайынсыз болуп жатканын билдирген.
Бул факты Кызыл-Кыя ШИИБдин маалыматтардын электрондук журналына катталып, ыкчам иликтөө иш-чаралары уюштурулуп, А.Төрөкуловдун жүргөн жери аныкталып, 2025-жылдын апрель айында Ысык-Көл облусунун Ак-Суу районунан табылып, алып келинди.
