Бишкек, 19.06.26. /Кабар/. Президенттин Баткен облусундагы ыйгарым укуктуу өкүлү Мамыржан Рахимов Сумбула айыл аймагынын эли менен жолугушту
Өкүлчүлүктөн билдиришкендей, жолугушууда жергиликтүү тургундар аймактагы социалдык-экономикалык көйгөйлөрдү көтөрүп, бир катар сунуш-пикирлерин билдиришти.
Тактап айтканда, сугат суу менен камсыздоону жакшыртуу, маршруттук каттамдардын санын көбөйтүү, баалардын кымбатташына байланыштуу маселелер, тазалык ишканасын атайын техникалар менен камсыздоо, жаңы бала бакча куруу, балдар үчүн оюн аянтчаларын уюштуруу, айылдагы топоз чарбасына байланыштуу маселелери айтылды.
Мындан сырткары, айылдардагы мыйзамсыз курулуштарды жөнгө салуу боюнча түшүндүрүү иштерин күчөтүү, жаштарды жумуш менен камсыздоо, ички жолдорду оңдоо, футбол аянтчасын куруу, эскирген электр мамычаларын жаңылоо жана жеке кайрылуулар боюнча маселелер көтөрүлдү.
Мамыржан Рахимов ар бир көтөрүлгөн маселе боюнча тиешелүү мекеме-ишканалардын жетекчилерине тапшырмаларды берип, мыйзам чегинде жана мүмкүнчүлүккө жараша чечүү боюнча иштер жүргүзүлөрүн белгиледи.
Жолугушууга облустук жана райондук мекеме-ишканалардын жетекчилери, жергиликтүү бийлик өкүлдөрү жана айыл тургундары катышып, жарандардын суроолоруна тиешелүү жооптор берилди.
Жолугушууга 250дөй жаран катышып, 30жаран ар кандай маселелер менен кайрылды.
Сумбула айыл аймагынын курамына Андарак, Искра, Сары-Дөбө жана Көк-Таш айылдары кирет. Айыл аймагынын жалпы калкынын саны 17 419 адамды түзөт.
