Бишкек, 15.09.26. /Кабар/. Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Корея эл аралык кызматташтык агенттигинин (KOICA) Кыргызстандагы директору Лим Соён менен жолугушту.
Министрликтен билдиришкендей, анда "Кыргыз Республикасында түшүм жыйналгандан кийинки башкаруу системасын түзүүнү колдоо аркылуу айыл чарба продукциясынын кошумча нарк чынжырын чыңдоо" долбоорунун 2024–2027-жылдардагы ишке ашырылышы талкууланды.
Долбоордун алкагында таттуу калемпир, капуста, малина жана кулпунай өндүрүү боюнча 160 дыйкан окуудан өтүп, 20 эксперт даярдалууда. Ошондой эле соода-логистикалык борборду куруу үчүн жер тилкеси аныкталып, курулуш иштерин баштоо пландалууда.
Тараптар айыл чарба продукцияларын сактоо, кайра иштетүү, таңгактоо жана логистика тармагындагы инфраструктураны өнүктүрүү маселелерине көңүл бурушту.
Рысгүл Акимжанова долбоор айыл чарба продукцияларынын жоготууларын азайтууга, сапатын жана атаандаштыкка жөндөмдүүлүгүн жогорулатууга, ошондой эле экспорттук потенциалды кеңейтүүгө өбөлгө түзөрүн белгиледи.
Жолугушуунун жыйынтыгында тараптар долбоорду натыйжалуу ишке ашыруу боюнча кызматташтыкты улантууга макулдашышты.
