Бишкек, 22.07.25. /Кабар/. Кыргызстанда унааларды мыйзамсыз каттоо схемасына бөгөт коюлду. Бул тууралуу Ички иштер министрлигинен билдиришти.
ИИМдин кызматкерлери тарабынан жүргүзүлгөн ыкчам-издөө иш-чараларынын натыйжасында Транспорт каражаттарын жана айдоочулук курамды каттоо боюнча мамлекеттик агенттиктин айрым кызмат адамдары кармалды. Алар кызмат абалынан кыянаттык менен пайдаланып, башка кызыктар жарандар менен алдын ала макулдашып, транспорттук каражаттарды мыйзамсыз каттоо схемасын уюштурушкан.
Тергөөнүн маалыматы боюнча, Кыргызстанга Honda үлгүсүндөгү унааларын тетик түрүндө алып келишкен. Андан кийин жасалма документтердин негизинде толук кандуу транспорттук каражат катары мамлекеттик каттоого алынган. Шектүүлөр бул аракети менен белгиленген бажы төлөмдөрүн төлөөдөн качышкан жана мыйзамсыз пайда алышкан. Алдын ала маалыматтар боюнча, мамлекетке 15 млн 677 миң 910 сом зыян келтирилген.
Аталган факт боюнча "Кызмат абалын кыянаттык менен пайдалануу" беренеси менен кылмыш иши козголгон.
Кылмыш ишинин алкагында 1994-жылы туулган О.А., 1984-жылы туулган Т.М., 1997-жылы туулган К.К., 1993-жылы туулган Ш.З., 1993-жылы туулган К.Ы., 1984-жылы туулган Т.Э. жана 1995-жылы туулган Р.У. кармалып, камакка алынды.
Учурда бул кылмыш иши боюнча тергөө иштери улантылып, кылмышка катышы бар башка адамдарды тактоо иштери жүргүзүлүп жатат.
