Бишкек, 21.02.25. /Кабар/. Жогорку Кеңештин депутаты Айбек Маткеримов 17-21-февралда Азербайжан Республикасынын Баку шаарында өткөн Азия парламенттик ассамблеясынын (АПА) 15-пленардык сессиясына катышты.
Жогорку Кеңештин коомчулук жана ЖМКлар менен иштөө бөлүмүнөн билдиришкендей, АПАнын 15-пленардык сессиясынын ишине 30дан ашык мамлекеттин парламенттеринин өкүлдөрү катышты.
Иш-чаранын жүрүшүндө парламенттик дипломатия, парламенттер аралык кызматташтыкты өнүктүрүү, экономикалык жана социалдык туруктуулукту бекемдөө, саясий диалогду тереңдетүү, ошондой эле Азия аймагындагы экологиялык коопсуздук жана климаттын өзгөрүүсү жаатындагы маселелер талкууланды.
Белгиленгендей, жыйындын негизги темасы «Азияда көп тараптуу кызматташтыкты бекемдөөдө парламенттик дипломатиянын ролу» болуп, анда социалдык жана маданий маселелер, бюджет жана пландоо, экономикалык жана туруктуу өнүгүү, саясий маселелер боюнча туруктуу комитеттердин баяндамалары угулду.
Жыйынтыгында АПАнын 15-пленардык сессиясынын Баку декларациясы кабыл алынды.
