Бишкек, 29.01.25. /Кабар/. Президенттин Жалал-Абад облусундагы өкүлү Тилек Текебаев кесипке багытталган кыска мөөнөттүү окуу курстарын уюштурууну тапшырды. Ал бул тууралуу облустун 2024-жылдагы жыйынтыгы, 2025-жылга коюлган пландарды караган коллегияда айтты.
Өкүлчүлүктөн билдиришкендей, Текебаев облустун социалдык-экономикалык, туристтик мүмкүнчүлүгүн жогорулатуу үчүн Бекмамат Осмонов атындагы Жалал-Абад мамлекеттик университетинин, Сузак районундагы №36 кесиптик лиейинин базасында кыска мөөнөттүү окуу курстарын уюштурууну тапшырды.
"Кытай - Кыргызстан - Өзбекстан темир жолу, 2025-жылы "Жалал-Абад эл аралык аэропортунун" курулушу башталды. Ошондуктан алдыдагы убакытта бул багыттагы адистерге болгон муктаждыктар жаралат", - деди ал.
Ошондой эле өкүл келген туристтерге жана элге сапаттуу сервистик тейлөө көрсөтүүчү адистерди даярдоону эскертти.
