Бишкек, 18.03.25. /Кабар/. Ош облусунун Өзгөн районуна караштуу Баш-Дөбө айыл аймагында 50 орунга ылайыкталган муниципалдык мейманкана курулуп жатат.
Президенттин Ош облусундагы өкүлчүлүгүнөн билдиришкендей, Жогорку Кеңештин төрагасы Нурланбек Тургунбек уулу облус башчысы Элчибек Жантаев жана депутаттар менен биргеликте имараттын курлуш иштери менен таанышты.
Район жетекчиси Каныбек Апбасов мейманканада түзүлүүчү шарттар жана долбоор тууралуу маалымат берди.
Имарат мурда клуб катары иштетилип, узак мөөнөткө ижарага берилген. Өткөн жылы айыл өкмөткө кайтарылып, багыты өзгөртүлүп, мейманкана катары капиталдык оңдоп-түзөөдөн өтүп жатат. 50 орунга ылайыкталган мейманканын курулуш иштери 70 пайыз аяктап калган. Курулушка каражат облустук өнүктүрүү фондунан жана жергиликтүү бюджеттен каралган.
Мейманкана ишке кирсе, аймакта жумуш орундар жана ар тараптан келген туристтерге мыкты шарт түзүлөт.
