Бишкек, 07.08.26. /Кабар/. 5-августта кытайлык STAR.VISION компаниясы Өзбекстандын Жерге алыстан байкоо жүргүзүүгө арналган "Samarkand-2028" спутнигин ийгиликтүү орбитага чыгарды. Бул тууралуу чет элдик илимий маалыматтарга таянып Өзбекстандын улуттук маалымат агенттиги жазды.
Долбоордун негизги өзгөчөлүгү — спутникке Өзбекстандын "Өзбеккосмос" агенттигинин адистери иштеп чыккан жасалма интеллект модулунун орнотулушу. Бул технология маалыматтарды түздөн-түз орбитада иштеп чыгууга мүмкүндүк берип, анализ жүргүзүү процессин тездетет жана Жерге жөнөтүлүүчү маалыматтын көлөмүн азайтат.
Спутник өз атын 2028-жылы Самарканд шаарында өтө турган 79-Бүткүл дүйнөлүк астронавтика конгрессине байланыштуу алган.
"Өзбеккосмос" агенттигинин директору Шухрат Кодировдун айтымында, "Samarkand-2028" өлкөнүн космостук технологияларды өнүктүрүү мүмкүнчүлүгүн көрсөттү.
Жаңы спутник айыл чарба жана суу чарбасында, айлана-чөйрөгө мониторинг жүргүзүүдө, жаратылыш ресурстарын көзөмөлдөөдө, өзгөчө кырдаалдардын алдын алууда жана шаар курууда колдонулат.
