Ташкент, 09.02.26. /Кабар/. Өзбекстан 2025-жылдагы Network Readiness Index (Тармактык даярдык индекси) боюнча дүйнөлүк рейтингде 9 баскычка көтөрүлүп, 72-орунду ээледи. Бул тууралуу АКШдагы Portulans институтунун отчётуна таянып, жергиликтүү маалымат каражаттары кабарлады.
Аталган индекс санариптик инфраструктуранын абалын, электрондук мамлекеттик кызматтардын өнүгүш деңгээлин, калк менен ишкер чөйрөнүн санариптик сабаттуулугун, ошондой эле IT-реформалардын натыйжалуулугун комплекстүү түрдө баалайт.
Акыркы жылдары Өзбекстандын көрсөткүчтөрү ырааттуу өсүүдө. Тактап айтканда, 2024-жылы өлкө 81-орунда турган болсо, 2025-жылы 72-орунга көтөрүлдү.
Адистердин пикиринде, бул көрсөткүч Өзбекстанда санариптик инфраструктураны өнүктүрүү, электрондук кызматтардын жеткиликтүүлүгүн кеңейтүү, калк жана бизнес үчүн санариптик көндүмдөрдү жогорулатуу багытында жүргүзүлүп жаткан иштердин натыйжасын чагылдырат.
Маалымат үчүн: дүйнөлүк рейтингде алдыңкы орундарды АКШ, Финляндия, Сингапур, Дания жана Швеция ээлейт.
