Бишкек, 04.11.25. /Кабар/. Туризмди өнүктүрүүнү колдоо фонду Бишкек шаарынын дене тарбия, спорт, туризм жана жаштар менен иштөө Департаменти жана Кыргызстандын усталар ассоциациясы менен маанилүү меморандумдарга кол койду.
Фонддон билдиришкендей, бул документтердин максаты — өлкө борборунун жана аймактардын туристтик мүмкүнчүлүктөрүн өнүктүрүү, ошондой эле ички жана иш-чаралык туризм тармагындагы өнөктөштүктү бекемдөө болуп саналат.
Келишимдерге ылайык, тараптар бир нече негизги багыттар боюнча кызматташышат:
- Санариптештирүү жана инновациялар: «Vizit Bishkek» мобилдик тиркемеси аркылуу маалымат алуу, маршруттарды тандоо жана кызматтарды брондоо мүмкүнчүлүгү.
• Жаштар демилгелери жана стартаптар: туризм багытындагы жаштар долбоорлоруна каржылык, консультациялык жана эксперттик колдоо.
• Окуялык жана спорттук туризм: шаардык фестивалдар, спорттук жана маданий программалар аркылуу туристтерди тартуу.
• Маркетинг жана бренд: Бишкекти туристтик багыт катары илгерилетүү жана борбордун туристтик брендин түзүү.
• Гостиница жана ресторан бизнеси: секторун өнүктүрүү жана сапаттуу туристтик кызматтарды кеңейтүү.
Бул меморандумдар узак мөөнөттүү өнөктөштүк түзүүгө жана Бишкек шаарында жана өлкө аймактарында ички жана окуялык туризмди өнүктүрүүгө чоң мүмкүнчүлүк берет.
