Бишкек, 28.05.26. /Кабар/. VI Дүйнөлүк көчмөндөр оюндарынын маданий программалары негизги 5 локацияда өтөт. Бул тууралуу маданият, маалымат жана жаштар саясаты министри Мирбек Мамбеталиев “Кабар” маалымат агенттигинде өткөн VI Дүйнөлүк көчмөндөр оюндарынын маданий программаларына арналган маалымат жыйынында билдирди.
Анын айтымында, ири маданий иш-чаралар төмөнкү аймактарда өтмөкчү:
- Ысык-Көл облусундагы Кырчын жайлоосунда жайгашкан "Көчмөндөр ааламы жандуу мурас" этно-маданий шаарчасы;
- Чолпон-Ата шаарындагы "Рух Ордо" маданий-этнографиялык комплексинде "Көчмөндөр ааламы — доорлор байланышы" эл аралык этно-маданий фестивалы;
- Ысык-Көл облусунун Бостери айылындагы "Дордой-Ноомад" этно-комплексинде этно-модерн стилиндеги "Ноомад-фест" фестивалы;
- Чолпон-Ата шаарындагы ат майданында "Глобалдык келечек — көчмөндөр жаңырыгы" этно-хиттер фестивалы өтөт;
- Ысык-Көл облусундагы Өрнөк айылында Курманжан датка атындагы Көчмөндөр цивилизациясы борборунда "Арт-лаб" чыгармачылык лабораториясы өтөт.
Маалымдалгандай, VI Дүйнөлүк көчмөндөр оюндарынын уюштуруу комитети тарабынан КР Эл артисти Алтынбек Максүтов маданий программалардын башкы режиссеру болуп бекитилген.
VI Дүйнөлүк көчмөндөр оюндары маданий багыттан тышкары, спорт жана илим тармагын камтыйт.
Эскерте кетсек, VI Дүйнөлүк көчмөндөр оюндары быйыл Кыргызстанда 31-августтан 6-сентябрга чейин өтөт.
