Бишкек, 12.08.26. /Кабар/. Жайыл районунда тиешелүү уруксат документтери жок иш алып барган төрт объект аныкталды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, жүргүзүлгөн текшерүүдө "Турук" туристтик борбору, автоунаа жуучу жана май алмаштыруучу жай, тейлөө станциясын тандырканага кайра профилдештирүү жана дарыкананы чайканага кайра профилдештирүү боюнча курулуш иштери аныкталган.
Аталган объекттерде тиешелүү уруксат берүүчү документтерсиз иштер жүргүзүлүп жатканы белгилүү болгон. Бул "Шаар куруу жана архитектура жөнүндө" мыйзамдын талаптарына каршы келет.
Натыйжада жеке ишкерлерге мыйзам бузууларды жоюу боюнча көрсөтмөлөр берилип, жалпы 256 миң сом өлчөмүндө айып пул салынды.
