Бишкек, 23.01.26. /Кабар/. Чүй облусунда унаа өрттөнүп, кыз менен жигит күйүп кеткен окуя боюнча "Адам өлтүрүү" беренеси менен кылмыш иши козголду. Бул тууралуу облустук милициядан билдиришти.
Белгилей кетсек, 20-январда Москва районунун Спартак айылында Volkswagen Golf-3 унаасы күйүп, ичинен 26 жаштагы айдоочу О.Э. менен жүргүнчүсү 16 жаштагы Т.С.нын сөөгү табылган.
Текшерүүнүн жүрүшүндө О.Э. унааны 11-январда сатып алганы, сол тарабындагы фарасы иштебей жаткандыктан электрикке кайрылганы аныкталган. Адис унаанын техникалык абалы начар экенин айтып, аны айдоонун кооптуулугун эскерткен.
"Учурда такталган жагдайларга карабастан, окуянын бардык чоо-жайын кылдат изилдөө жана тергөө амалдарын жүргүзүү максатында "Адам өлтүрүү" беренеси менен кылмыш иши козголду", - деп айтылат маалыматта.
Чүй облустук милициясы жарандарды чындыкка коошпогон маалыматтарды таратпоого чакырат.
