Бишкек, 07.05.26. /Кабар/. Бүгүн, 7-майда Бишкек шаарында Улуу Жеңиштин 81 жылдыгына арналган "Жеңиш ырлары" урааны алдында автожүрүш өткөрүлдү. Бул тууралуу Коргоо министрлигинен маалымдашты.
Анда белгиленгендей, иш-чара тарыхый эстутумду сактоо, жаштарды аскердик-патриоттук тарбиялоо жана Улуу Ата Мекендик согуштун ардагерлерине урмат көрсөтүү максатында уюштурулду. Ага "Согуштун, Куралдуу Күчтөрдүн, укук коргоо органдарынын жана ооруктун ардагерлеринин республикалык кеңеши" коомдук бирикмесинин өкүлдөрү катышты.
Автоколоннанын жүрүшү Бишкек шаарынан башталып, "Ата-Бейит" мемориалдык комплексинен 73809 аскер бөлүгүнө чейин ("Ала-Тоо" полигону) барып, Беш-Күңгөй айылы аркылуу кайра кайтты.
Иш-чаранын жүрүшүндө катышуучулар "Жеңиш" мемориалына гүл коюп, курман болгон баатырларды эскеришти. Ошондой эле согуш жылдарындагы ырларды аткарышып, элдин кайраттуулугу, биримдиги жана баатырдыгын даңазалашты.
