Бишкек, 30.01.25. /Кабар/. 29-январда Бишкекте 100 жаш курагында Улуу Ата Мекендик согуштун баатыры, персоналдык пенсионер Түркенакун Бейшенбаев дүйнөдөн кайтты. Бул тууралуу мэриядан билдиришти.
Бейшенбаев Түркенакун 1925-жылы 1-июлда Ысык-Көл облусунун Тоң районундагы Төрт-Көл айылында туулган. 1942-жылдын аягында Советтик Армиянын катарына чакырылып, Украина, Беларус, Венгрия, Молдавия, Румыния, Чехословакиядагы салгылашууларга катышкан. Украинадагы Чабастын жанындагы салгылашта катуу жарадар болуп, бирок дарылангандан кийин кызматына кайтып келип, уланткан. 1946-жылдын июнь айында Советтик Армиядан демобилизацияланган.
Эрдиги жана берилгендиги үчүн бир катар мамлекеттик сыйлыктар менен сыйланган, анын ичинде:
- СССРдин Финансы министрлигинин Ардак грамотасы;
- 2-даражадагы Ата Мекендик согуш ордени;
- Жуков атындагы жана юбилейлик медалдар менен сыйланган.
"Кабар" маалымат агенттигинин жамааты Түркенакун Бейшенбаевдин үй-бүлөсүнө жана жакындарына терең кайгыруу менен көңүл айтып, аза кайгысын тең бөлүшөт.
