Бишкек, 09.02.26. /Кабар/. Кореянын Кёнгидо провинциясында аскердик тик учак кулады. Бул тууралуу "Рёнхап" агенттиги билдирди.
Маалыматка ылайык, кырсык бүгүн саат 11:00 чамасында болгон. Кулаган Cobra AH-1S үлгүсүндөгү чабуул коюучу тик учак Түштүк Кореянын кургактагы аскерлерине таандык болгон. Борттогу 2 адам оор жаракат алып, жүрөгү токтогон абалда ооруканага жеткирилген. Алардын абалы өтө оор деп сыпатталууда, бирок өлүм фактысы азырынча тастыктала элек.
"Кёнгидо провинциясынын Капхён уездинде аскердик тик учак кырсыкка учурады. Жабыркагандар тууралуу маалыматтар такталууда", — деп жазды агенттик.
Бийлик өкүлдөрү кырсыктын кесепетинен жарылуу жана өрт чыкпаганын белгилешти.
