Күз мезгили Бишкектин көнүмүш көрүнүшүн акырындык менен өзгөртүүдө. Шаардын көчөлөрү менен сейил бактары алтын түстөргө боёлуп, бак-дарактардын жалбырактары күбүлүп, борбор калаада күнүмдүк жашоо өз нугунда уланууда.
Мезгилдин өзгөрүшү өзгөчө шаардын борбордук бөлүгүндө байкалат. Опера жана балет театрынын айланасында, Эркиндик бульварында жана Эмен паркында күзгү жаратылыш шаар пейзажынын ажырагыс бөлүгүнө айланган.
Аллеяларда күнүмдүк иштерине шашкан адамдарды, сейилдеп жүргөн шаар тургундарын жана күздүн кооз көрүнүштөрүн сүрөткө тартып жаткан жарандарды көрүүгө болот.
Алтын түскө боёлгон жалбырактар, салкын аба жана күндүн жумшак нуру шаарда өзгөчө маанай жаратат. Жылдын ушул мезгилинде Бишкектин көнүмүш көчөлөрү да башкача өңгө ээ болот.
Бишкектеги күз — бул жөн гана мезгилдин алмашуусу эмес, шаарга жаңыча көз караш менен карап, анын майда көрүнүштөрүнө көңүл буруп, күнүмдүк турмуштун кооздугун байкоого мүмкүнчүлүк.
Көңүлүңүздөргө күздөгү Бишкектин көрүнүштөрүн тартуулайбыз.
